ՔՐԻՍՏՈՍ ՀԱՐՅԱՎ
ՍԲ. ՀՈՎՀԱՆՆԵՍ ՈՍԿԵԲԵՐԱՆ
Եթե մեկը բարեպաշտ է և աստվածասեր, բարի ու պայծառ այս տոնախմբությունը թող ըմբոշխնի: Եթե մեկը բարեմիտ ծառա է, իր Տիրոջ ուրախության մեջ թող մտնի ցնծալով: Եթե մեկը վաստակել է` պահք պահելով, այժմ դահեկանը թող վայելի: Եթե մեկն առաջին ժամից է աշխատել, արդար հատուցումն այսօր թող ստանա1: Եթե մեկը երրորդ ժամից հետո է եկել, գոհությամբ թող տոնի: Եթե մեկը վեցերորդ ժամից հետո է հասել, բնավ թող չերկմտի, քանզի բոլորովին չի տուժում: Եթե մեկն ուշացել է մինչև իններոդ ժամը, թող մոտ գա` բոլորովին չտատանվելով: Եթե մեկը միայն ժամը տասնմեկին է հասել, ուշ լինելուց թող չվախենա, քանզի Տերը, առատաձեռն լինելով, ընդունում է վերջինին` ինչպես և առաջինին. Ժամը տասնմեկին եկածին հանգիստ է շնորհում` ինչպես առաջին ժամից աշխատածին. և՛ վերջինին է ողորմում, և՛ առաջինին է խնամում. թե՛ նրան է տալիս, թե՛ սրան է շնորհում: Ե՛վ արարքներն է ընդունում, և՛ կամքն է ողջունում: Գործն էլ է պատվում, մտադրությունն էլ է գովաբանում: Արդ, բոլո՛րդ Տիրոջ ուրախության մեջ մտեք: Թե՛ առաջիններդ, թե՛ երկրորդներդ, վարձքն ըմբոշխնեցեք:
Հարուստնե՛ր և աղքատնե՛ր, միասին պարեցեք: Ժուժկալնե՛ր ու ծույլե՛ր, Օրը պատվեցեք: Պահքը պահածնե՛րդ ու չպահածնե՛րդ, այսօր ցնծացեք: Սեղանը լիառատ է, ամե՛նքդ վայելեցեք: Պարարտ է եզը, որևէ մեկը քաղցած թող դուրս չգա: Բոլո՛րդ վայելեցեք խրախճանքը հավատքի: Բոլո՛րդ ըմբոշխնեցեք հարստությունը բարության: Ոչ ոք աղքատությունը թող չողբա, քանզի ընդհանուր Արքայությունը հայտնվեց:
Ոչ ոք հանցանքները թող չկոծի, որովհետև Գերեզմանից ներումը ճառագեց: Ոչ ոք մահվանից թող չվախենա, քանզի Փրկչի մահը մեզ ազատագրեց: Շիջեց մահը` դրանից բռնված լինելով: Դժոխք Իջածը դժոխքն ավարեց: Իր մարմինը ճաշակած դժոխքին Նա դառնացրեց, և Եսային, կանխավ իմանալով դա, աղաղակեց. «Դժոխքը, – ասաց, – դառնացավ` ներքևում Քեզ հանդիպելով» (Ես. 14, 9): «Դառնացավ», քանզի խափանվեց: «Դառնացավ», քանզի ծաղրվեց: «Դառնացավ», քանզի մեռցվեց: «Դառնացավ», քանզի վերացավ: «Դառնացավ», քանզի շղթայվեց: Մարմին ընդունեց, բայց Աստծուն հանդիպեց: Հող ընդունեց, բայց երկնքին հանդիպեց: Ընդունեց` ինչը որ տեսնում էր, ընկավ` որտեղից չէր տեսնում:
Ու՞ր է մահ, քո խայթոցը. դժո՛խք, որտե՞ղ է քո հաղթությունը: Հարյա՛վ Քրիստոս, և դու տապալվեցիր: Հարյա՛վ Քրիստոս, և դևերն են ընկնում: Հարյա՛վ Քրիստոս, և հրեշտակներն են ցնծում: Հարյա՛վ Քրիստոս, և կյանքն է ազատ ապրում: Հարյա՛վ Քրիստոս, և գերեզմանում որևէ մեռյալ չկա. Քրիստոս, մեռյալներից հարություն առնելով, ննջեցյալների երախայրիքը դարձավ:
Նրան փառք և կարողություն հավիտյանս հավիտենից. ամեն:
Հին հունարենից թարգմանությունը` Գ. Ղազարյանի:
© www.orthodoxkyanq.org
1Ոսկեբերան հայրապետի այս ճառի առաջին մասը հիմնված է Տերունի առակներից մեկի վրա. տե՛ս Մատթ. Ի, 1-16:
ՔՐԻՍՏՈՍ ՀԱՐՅԱՎ